رب اخ لم تلده امك !

بالرغم من عدم وجود اى سبب طبيعى يوصل اتنين بالظروف دى لبعض ف الوقت دا ... وكمان مفيش سبب لوجك للحاله دى ابداااا
بس ربنا يعلم انها لله ف لله :)

هو الكلام اللى هاكتبه دا غالى اوووى مش علشان معانيه لكن الاغلى هو اللى كاتبه ...ربنا ما يحرمنى منك :)

ياسوبر مان ياركن الامان

ياجدع اخ ف هذا الزمان

فى الطلب موجود ولا ف اى مكان

تساعد وتخدم اى انسان

من غير مايطلب ولا ع وشه اى حاجه تبان

ياحنين وقلبك بالخير مليان

والاحسان

والحب وكمان الايمان

بتشيل الهم والاحزان من اى قلب والسلام

دايما بطل شجاع مغوار والسماح فيك صفه مش اسم ولا اى كلاااام

ولما قلبك يضيق بتبكى ف ركن وسط الظلام

لا بتشيل حد همك ولا فى المحنه نفسك تهمك

ياطوق النجاة هنا ف الحياه

احترت فيك ياأ حسن رفيق

فلك منى باقة زهور تبتسملك وتقول ربنا معاك

تناتيش قلم !

التدوينه دى كنت كاتبها ع الفيس بتاريخ Monday, 26 November 2012 !

طب حتى كنت فكر قبل ما تاخد القرار

دا العمر بيجرى وفى ثانيه هتجف كل الانهار

قبل ما تقول كنت افتكر انك فيوم كنت بتنهار

ما بكرا ترجع وتقول فاكر يا .... زمان؟

ساعتها هيرد ويقولك طب فاكر انت مين اللى خان؟

فترجع وتندم وتقول .... يا ريت اللى جرى ما كان

هيفيد بايه ندمك بعد ما ماتت قوته

دا كلامك كان له ناره وسبب حرقته

و اهو من بعدك عايش مهوش ميت

جايز فيوم دمعته كانت جوا قلبه بتبيت

لكنه صامد ولا عمره لسوء النيه بيت

عاشلك مخلص ..... بس برضو مات وفى

وكنت انت المنقذ اللى .... فجاه قلب مختفى

كنت ليه الحلم اللى ياما علشانه حفى

مش هنحكى ف اللى جرى ولا يوم هنوصف اللى حصل

مفيش شهيد فيوم صحى ... وخد بطاره ماللى قتل

بس اوعدك ان الدرس هيبقى حكمه ... هيبقى مثل

وان رجعتوا مره تانى .... ياريته ينسى اللى فات

بس دا ممكن يبقى فصل جوا كتاب الذكريات؟؟

اصل قلبه اللى طيب واللى عمره ما يوم قسى

هو برضو اللى قالك فى حاجات ولا مره بتتنسى

كلام والسلام

كلامى النهارده هيبقى عن فكرة الابوة مقصدش بيها الاب لكن اقصد بيها الاهل .. ولى امرك يعنى .... او تقدر تقول المجلس الاعلى للبيت عندك .. وهبقى متحيذ جدا لفكرة ليه لا !

كام مره حسيت انك لما تبقى اب مش هتعمل مع عيالك زى بابا ما بيعمل معاك او زى ما ماما بتعمل معاكى ؟
طبعا متبقاش مصرى وكمان متبقاش عربى لو معملتش كدا .... الفكره هنا بسيطه اوووى ... ليه دا بيحصل ؟

الصراحه دورت كتير فى الموضوع دا وكان غالبا الرد اللى باسمعه من كل المتخصصين وباشوفه فى معظم الكتابات المتعلقه بالموضوع دا ... ان الفكره كلها متلخصه فى فرق السن او فرق الثقافه اللى اكتسبها الاباء من اجيالهم واللى اكتسبتها اجيالنا احنا ... ومدى بعدهم عن المستوى التفكيرى للاطفال او للابناء اى كان  سنهم.
"مش هاطول ف الكلام العلمى دا لانى مقالاتى مش علميه ولا عمرها هتبقى علميه :) تقدر تقول دا مبدأ ^__^ "

نتكلم بموضوعيه شويه ,العلاقه الابويه واللى فى اغلب الاحيان بتبقى معتمده على التسلط والدكتاتوريه J بشكل مبدأى يعنى نقدر نقول بنفهمها كدا.

الاب .... هذا الشخصيه العظيمه اللى فى حياة كل واحد فينا .... واللى بتختلف نظرتنا ليه حسب طموحتنا ... لكن مين ف البنات مكنتش بتتمنى انها تتجوز واحد زى بابا وشبه بابا ؟؟ ومين ف الولاد متمناش فى يوم انه يبقى زى بابا لما يكبر فى حاجات كتير .
لو اجابتك عن الكلام اللى فوق دا هى " مش انا " ودا وارد جدااا كمان ... يبقى سيبنى اوضحلك شويه حاجات بسيطه لو سمحت .... الاب دا هو سبب من اسباب دخولك للحياة كلها ... وهو كمان اللى بيتعب فى تربية سيادتك لغايه اللحظه اللى بتقرا فيها المقال دلوقتى.
لكن الصراحه الاجيال الجديده كلها بتواجه مشكله كبيره فى ادراك الموضوع دا والسبب فى كدا هو بعض العوامل اللى مكنتش موجوده زمان.

على سبيل المثال وليس الحصر طبعا : الدراما والسنيما ... لعبوا دور مهم جداا فى تشويه صورة الاب بوجه عام .... يعنى مثلا فى كام مسلسل اتفرجت عليه وانت صغير وكان الاب فيه شخصيه عظيمه ؟؟ طب فى كام فيلم كان الاب فيه بطل او مكافح بيربى ابناءه ؟ للاسف حتى لو فى كتير فهتلاقى انهم مش معلمين ف الذاكره زى باقى الصور اللى شوفنها للاباء ف المسلسلات والافلام.

نصيحه .... فكر فى علاقتك بوالدك قبل فوات الاوان ,فكر ازاى تقربه منك حتى لو هو ناسيك ,فكر ازاى تخليه يثق فيك لو دى
مشكلتك ,فكر ازاى تتعامل معاه بالطريقه اللى هو عاوزه وتعمل اللى انت عاوزه ,حاول تكسبه فى صفك وتستمع بحياتك معاه لان اليوم اللى بيعدى مبيرجعش تانى .

لو جينا نتكلم عن الام بقى فمش هيكفينا كلام ابدا مهما قولنا , بس انا هاطبق نفس النظريه على الام ... كام مره شوفنا ف الدراما الام كانت شخصيه ممكن تبقى قدوه للبنات ؟؟
طبعا علاقتنا بالام اكتر بكتيير من علاقتنا بالاب ... دا شئ مفروغ منه ... ومتبقاش طفل مصرى لو مكنتش بتحب اخوالك اكتر من اعمامك ^__^ .

السبب فى كدا بيكون ف الاغلب راجع لطبيعة البيت المصرى اللى فيه الاب طول الوقت شغال والام ف البيت وبالتالى بنرتبط بالام اكتر وبنحكيلها كل حاجه وبالتالى بتبقى اقرب للابناء من الاب . انا باتكلم بشكل عام على فكره .

الخلاصه بقى من كل الموضوع دا هو اننا لازم نفكر فى علاقتنا بالاهل من تانى ... يعنى لو فى احدى العلاقتين مش تمام فانت لازم تبدأ من النهارده تفكر انك تحلها .
متسألش ازاى ومتقولش مفيش حل ... صدقنى لو فكرت كويس هتلاقى مليون طريقه وحل ... بس لازم تلحق نفسك قبل ما ترجع تندم على كل ثانيه كنت بعيد عنهم ... ولو كنت قريب من اهلك .. فياسعدك وياهناك J ربنا يجعلهم سبب فى دخلوك الجنه .

سوبر مان .... شخصيه حقيقيه !

كتير مننا او يمكن كلنا عاش العصر بتاع سوبر مان ... الشخصيه الكارتونيه الرائعه ,واللى كان كل همها انها تنشر الخير وتحارب الشر ... زيها زى سبيدر مان وبات مان وشخصيات كتير اوووى ..... بس مين فينا فكر ف يوم ان سوبر مان دا شخص حقيقى ؟؟ كام واحد فكر ف كدا ؟ طب لما كبرت شويه ؟؟ كنت لسه معتقد كدا ؟؟ طب ودلوقتى بقى ؟؟
فى الاغلب هتكون الاجابه لا يا عم مش شخصيه حقيقيه ولا حاجه .... كنا وقتها عيال بقى وكان تفكيرنا على قدنا ..... بس انا جاى النهارده اقول ان سوبر مان دا شخصيه حقيقيه .... ويمكن قابلناها كتير كمان.
سوبر مان هو الشخص اللى مبيعرفش يسيب حد محتاج مساعده وميساعدوش ... هو اللى دايما ناسى نفسه اصلا ... وحتى ظالم اللى المفروض يبقى معاهم على طول لانه مش قادر ميساعدش الناس ... ساعات بقى سوبر مان دا بيحس انه مخنوق اوووى ... بس مش بسبب الماده اللى من كوكب تانى اللى كانت ف المسلسل "الكريبتونايت" ... بس بسبب انه فى حد هو مش عارف يساعده ... ومع انه مليان مشاكل وغلطات ... بس مبيفكرش ابدا انه يطلب المساعده من حد لانه شايف ان دوره المفروض يبقى انه يساعد مش انه يشغل حد بمشاكله .... بس نصيحه بقى لكل الناس ... لما تقابلوا سوبر مان ... اعرفوا انه لازم يساعد ناس كتير ... فلو انشغل عنك بعد ما مشكلتك خلصت .... متفتكرش انه خلاص نسيك ... بس تأكد انه ف الوقت دا يا اما مشغول انه يخبى مشاكله او يحلها ... او انه مشغول مع حد تانى بيساعده لانه شايف ان دا واجب عليه ولازم يعمله ... خليك دايما واثق انك اول ما تقوله الحقنى انا محتجاج ... هتلاقيه جنبك ... يا ترى قابلنا سوبر مان فى حياتنا ولا لسه ؟؟
عن نفسى ... هاموت واقابله .... لان الشخصيه دى نااادر اوى لما تلاقيها وتتعرف عليها .... ايه رايك لما تبقى انت سوبر مان ؟؟ ^___^